* కప్పు పచ్చిపాలూ, పావు కప్పు తేనె, అయిదు చుక్కల కొబ్బరి నూనెను కలిపి ఈ మిశ్రమాన్ని గోరువెచ్చటి నీటికి కలిపి స్నానానికి ఉపయోగించాలి. ఇలా వారంలో రెండు మూడు సార్లు చేయడం వల్ల చర్మంపై ఉండే మృతకణాలు తొలిగిపోయి మృదువుగా, కాంతిమంతంగా మారుతుంది.
* పాలలో విటమిన్‌ ఎ ఎక్కువ మోతాదులో ఉంటుంది. ఇది చర్మాన్ని పొడారిపోకుండా చూస్తుంది.
* పాలలోని లాక్టికామ్లం మొటిమలకు కారణమయ్యే సూక్ష్మజీవులతో సమర్ధంగా పోరాడుతుంది. ముందుగా ముఖాన్ని శుభ్రం చేసుకుని పాలలో చిన్న దూది ఉండ ముంచి మొటిమలు ఉండే ప్రాంతంలో మృదువుగా రాయాలి. ఇలా క్రమం తప్పకుండా చేస్తే మంచి ఫలితం ఉంటుంది.
* ఒక టేబుల్‌ స్పూన్‌ చొప్పున ఓట్‌మీల్‌, పాలు తీసుకుని కలపాలి. ఈ మిశ్రమాన్ని శుభ్రం చేసుకున్న ముఖానికి రాసుకోవాలి. దాన్ని మీ చేతివేళ్లతో మృదువుగా మర్దనా చేయాలి. ఇలా చేయడం వల్ల ముఖంపై ఉండే మృతకణాలూ; అధికంగా ఉండే నూనెలు, దుమ్మూధూళి పోయి చర్మం శుభ్రపడుతుంది. పదిహేను నిమిషాలాగి చల్లటి నీటితో కడిగేయాలి.
* పాలలోని లాక్టిక్‌ ఆమ్లం పిగ్మెంటేషన్‌ను తగ్గిస్తుంది. చర్మానికి కావాల్సిన తేమనూ అందిస్తుంది. సూర్య కిరణాల వల్ల కమిలిన చర్మానికి సాంత్వనను చేకూరుస్తుంది. పాలలో దూది ఉండను ముంచి ముఖంపై నెమ్మదిగా, మృదువుగా రాయాలి. పది-పదిహేను నిమిషాల తర్వాత చల్లటి నీటితో కడిగేయాలి. ఇలా తరచూ చేస్తుండటం వల్ల మీ చర్మానికి కావాల్సిన తేమ అందడంతోపాటు మృదువుగా తయారవుతుంది.